હળવા તે હાથે

હળવા તે હાથે

હળવા તે હાથે ઉપાડજો રે અમે કોમળ કોમળ,

સાથરે ફૂલડાં ઢાળજો રે અમે કોમળ કોમળ.....

આયખાની આ કાંટ્યમાં રે અમે અડવાણે પગ,

રૂંવે રૂંવે કાંટા ઊગિયા રે અમને રૂંધ્યા રગેરગ;

ઊના તે પાણીડે ઝારજો રે અંગ કોમળ કોમળ,

ખેપનો થાક ઉતારજો રે અમે કોમળ કોમળ...

પે’ર્યા ઓઢ્યાના ઓરતા રે છોગે ગુલાબી,

આંખમાં રાત્યું આંજતા રે અમે ઘેન ગુલાબી;

કૅડિયે કોયલ ગૂંથજો રે અમે કોમળ કોમળ,

ફૂમતે મોર ગે'કાવજો રે અમે કોમળ કોમળ..

હાથ મૂકી મારે કાળજે રે પછી થોડુંક લળજો :

-ભવ ભવ આવાં આકરાં રે અમને જીવતર મળજો!

-ભવ ભવ આવાં આકરાં રે અમને જોબન ફળજો!

કેવા જીવ્યાના અભરખા રે હતા કોમળ કોમળ!

ફૂલના પોઢણ સાથરા? કેવા કોમળ કોમળ!

halwa te hathe