ગુલાલની ગલીઓમાં ચાલો

એક સથવારો સગપણનો,

કે મારગ મજિયારો બે જણનો.

આંખલડીના દીવા રે દીવા,

અજવાળાં! અજવાળાં!

વાંસલડીના ટહુકા રે ટહુકા

પરવાળાં! પરવાળાં!

—એક અણસારો ઓળખનો,

એક ઝબકારો એક ક્ષણનો.

ખબર નથી પણ અમથું અમથું

લાગે વહાલું વહાલું,

મેઘધનુષની જાદુઈ રંગત

શું ઝીલું? શું ઝાલું?

—એક ધબકારો રૂદિયાનો,

એક પલકારો પાંપણનો.

ગોપીજનનો ગ્વાલબાલ ને

રાધાનો શામળિયો,

પ્રેમ તો પોતે પરમ પદારથ,

વહાલો ને વાદળિયો :

—એક સનકારો સોબતનો,

જાણે મિસરી ને માખણનો.

સપનાંની સંગતથી કેવું

આખું ગગન ગુલાબી!

ગુલાલની ગલીઓમાં ચાલો...

શું જમણી? શું ડાબી?

—એક ફણગો છે ફાગણનો,

એક તણખો છે શ્રાવણનો.

એક

સથવારો

સગપણનો.

Gulalni Galioma Chalo