રેખ્તા
હિન્દવી
સૂફીનામા
રાજસ્થાની
અમલકટોરી
amalaktori
વેણીભાઈ પુરોહિત
વેણીભાઈ પુરોહિત
ભર મન! બ્રહ્મપ્રેમનો પ્યાલો રે
મને હરિરસ વ્હાલો રે....
અંગૂર ને આંબાના રસને મનથી મૂકી દીધો,
સતવાયકનો લીલો લીમડો ઘૂંટીઘૂંટી પીધો:
મારગ સુરગંગાનો લીધો.
—ભર મનo
માયાનાં ધાવણ ધાવેલું મનડું મારું ઝેરી,
હૈયાના કંગાલ મનોરથ દીધા આજ વધેરી:
વાગી અનહદની રણભેરી.
—ભર મનo
કાળતણું કરજુગલ બિચારું રગડે છો તન-માટી,
જીવનની લાખેણી ખલમાં બ્રહ્મભક્તિ મેં વાટી:
મારે ઊંચી આત્મ-સપાટી.
—ભર મનo
સંતન! મેં સજીવન પીધું, ગયો કાળ—ઘા ઠાલો,
‘આખર’ની વૃન્દાવનકુંજે ગુંજત મુરલીવાલો:
ઊડે ચેતનરંગ–ગુલાલો.
—ભર મનo
રગરગ બ્રહ્મભાવના ફોરી!
પીધી હરિરસ–અમલ-કટોરી!
સ્રોત
- પુસ્તક : સિંજારવ (પૃષ્ઠ ક્રમાંક 6)
- સર્જક : વેણીભાઈ પુરોહિત
- પ્રકાશક : એન. એમ. ત્રિપાઠી લિ.
- વર્ષ : 1955