ગીરના નેસમાં રાત

ગીરના નેસમાં રાત

એક ચંદ્ર ઝલમલતો ભૂખરાં પર્ણોની જાળીમાં

બીજો ચૂલેથી સીધો ઊતરે પિત્તળની થાળીમાં

શેડકઢાં દૂધની તાંસળીઓ ચડે મુછાળા મોઢે

ગીરની કાળી રાતનું ધીંગું ઢીમ ઢળ્યું છે કોઢે

ફગફગ ઊઠતી ઝાળે જાગે બરછટ બાઘા ચહેરા

વંડા વચ્ચે ધખે તાપણાં ભરે નેસના પહેરા

નજીક હૂકતો સાવજ, કૂંડે રાની જીભ લપકારે

ચીબરી ચીખતી ઊડે, ઝાડવું સ્થિર રહે ધબકારે

જંગલ માથે હાથ ફરે છે અંધકારનો કરડો

મક્કમ મૂંગો વધી રહ્યો જાણે અજગરનો ભરડો

ક્યાંક મરગનું ગળું ટૂંપાયું, ક્યાંક સરપનું સરવું

ઘૂક થઈને પ્રસર્યું મૂંગા પ્રાણોનું પરહરવું

સામે ઢોળે મારણમાં મોં ઘાલી સિંહણ ગાજે

અને બચોળાં વીખે પાસળાં, લિયે બથોડા, બાજે

આંખો મીંચી હવા સૂંઘતું બેઠું સાબરટોળું

સવાર થાતાં ઓછું થાશે આ વાડાનું કોળું

Gir na nes ma raat