ગીત વગરનું ગીત

ગીત વગરનું ગીત

બાઈ, બેઠી'તી આજ લગી ઈ માંડવો કડડભૂસ પડ્યો!

માંડવા ભેળો આંખથી કાળા જળનો ઊનો દરિયો દડ્યો!

હેમ ભરેલાં વર્ષો, મારું લોહીનું જગત, ડગલાં સંધાં,

બાપની ફળી, પીપળો, ગલી, સામટાં ગળે બાઝે!

ફરતું ચારેકોર્ય વીતેલું સમણા જેવું ઝબકી પાછું

બાવળિયું થઈ ગામ બળે, આ હાથનો મુલક દાઝે!

બાઈ, બેઠી'તી આજ લગી ઈ બાગ ઊડીને ક્યાંય પડ્યો!

પડ્યા ભેળો આંખથી કાળા જળનો ઊનો દરિયો દડ્યો!

આમ તો સૌની હાર્યે ખાવું પીવું ઊઠવું બેસવું અને

બેસવું ઊઠવું પીવું ખાવું હસવું રોવું કરવું!

પણ, ઉનાળો પંડ્યમાં ગર્યો - રૂંવે એની ઝાડિયું ફૂટી,

લાવારસે ડુંગરા તૂટ્યા, ખૂટતું ગયું ડરવું!

બાઈ, બેઠી'તી આજ લગી ઈ ઉંબરો અંગે અંગ રડ્યો!

રડ્યા ભેળો આંખથી કાળા જળનો ઊનો દરિયો દડ્યો!

Geet Vagarnu Geet