મારે આજનો દિવસ અતિ ઉજળો;

હું તો ગણેશ વધાવાને જૈશ,

મારે સોના સમો રે સૂરજ ઉગિયો;

મોટે હરખે મેં પગરણ માંડિયું;

હું તો લાખેણો લ્હાવો લૈશ, મારે...

આજ સુખનો રત્નાગર રેલિયો;

આજ લખમીની દીસે લીલાલ્હેર, મારે;

આજ દશે દિશાઓ દિસે ઉજળી,

આજ શોભી રહ્યું છે સારૂં શેહેર, મારે...

હું તો તરિયા તોરણ બંધાવું ટોડલે,

મોઘાં મોતીડે પૂરાવું ચોક, મારે;

હું તો વાજાં વગડાવું હેતે હરખનાં;

લીલા જોવા મળે લાખો લોક, મારે...

કહાવું વ્હાલાં સગાંને વધામણી;

કરૂં આનંદ ઓચ્છવ આજ, મારે;

આજ ધન્ય ઘડી ને ધન્ય દહાડલો;

જાણું આજ મળ્યું રૂડું રાજ, મારે...

મારે આંગણે સાજન મળી આવશે;

મારાં ઝરૂંખાં ઝાકઝમાળ, મારે;

ઓપે ઇંદ્રાપૂરી શા મારા ઓરડા;

સોના ૫ત્રે મઢેલી પરસાળ, મારે...

હું તો સુડલા કોયલડીને વિનવું;

કરો મારે આંગણે કલ્લોલ, મારે;

તમે બેસી સોનાને સુંદર પાંજરે;

બોલો બોલો મધુરા મુખે બોલ, મારે...

સજની સારી વધામણી સાંભળી;

મને આનંદ વાધ્યો અંગોઅંગ, મારે;

આજ ક્રોડ દીવાળી જેવો દીન કહું;

વધ્યો એથી પણ વધતો ઉમંગ, મારે...

આજ ઘેર ઘેર આનંદ છે ઘણો;

આજ શણગાર્યું છે સારૂં ગામ, મારે;

એવો ઉત્તમ અવસર જાણીને;

દેછે આશિષ દલપતરામ, મારે...