રેખ્તા
હિન્દવી
સૂફીનામા
રાજસ્થાની
વાદળ થઈએ
vadal thaiye
ધ્રુવ ભટ્ટ
ધ્રુવ ભટ્ટ
ચાલને વાદળ થઈએ અને જોઈએ કે ક્યાંક થાય છે ધોધમધોધ જેવું કંઈ આપણા વિશે
આપણામાં કોઈ હળ જોડે કે કોઈ બે જણાં જાય ભીંજાતાં ખેતરે ભણી જાય ભીંજાતાં
વાવણી મિષે
આપણે તો આકાશ ભરીને આવવું અને છલકી જાવું એવડું વનેવન
નાગડાં નાતા છોકરાંને જોઈ થાય તો આખા ગામને એની જેમ નાવા’નું મન
હોય એવું તો થાય ગણીને આપણે તો બસ વરસી જાવું ગામને માથે સીમને માથે,
ઉગમણે આથમણી દિશે
ચાલને વાદળ થઈએ અને જોઈએ કે ક્યાંક થાય છે ધોધમધોધ જેવું કંઈ આપણા વિશે
સાવ ધોળાં કે સાવ કાળાં જેમ ચાહીએ એવાં ફૂલ-ગુલાબી રંગની રેલમછેલ
આપણી મોજે આપણાં ચિત્તર કાઢીએ એવું આયખું મળે દેહની તૂટે જેલ
આપણે તો બસ આપણામાંથી નીકળી જાવું ઝરમરીને કોઈ અજાણી ઝાકળ-ઘેલી
પાંદડી વિશે
ચાલને વાદળ થઈએ અને જોઈએ કે ક્યાંક થાય છે ધોધમધોધ જેવું કંઈ આપણા વિશે
સ્રોત
- પુસ્તક : ધ્રુવગીત (પૃષ્ઠ ક્રમાંક 9)
- સર્જક : ધ્રુવ ભટ્ટ
- પ્રકાશક : ગૂર્જર ગ્રંથરત્ન કાર્યાલય
- વર્ષ : 2021