samdar - Geet | RekhtaGujarati

સમદર સભર સભર લહરાય!

બુંદ બુંદની સૂરત નિરાલી,

કોઈ રોવે, કોઈ ગાય :

સમદર સભર સભર લહરાય!

કોઈ રમે તેજની લકીર,

કોઈ ભમે ઓલિયો ફકીર,

લહર લહરની આવનજાવન

ભવ ભરનીંગળ થાય :

સમદર સભર સભર લહરાય!

કોઈ બુંદે પોઢ્યું ગગન,

કોઈ બુંદે ઓઢી અગન,

કોઈ મગન મસ્ત મતવાલું મરમી

મંદ મંદ મલકાય :

સમદર સભર સભર લહરાય!

બુંદ બુંદની સૂરત નિરાલી,

કોઈ રોવે, કોઈ ગાય :

સમદર સભર સભર લહરાય!

સ્રોત

  • પુસ્તક : બૃહદ્ પરિક્રમા (પૃષ્ઠ ક્રમાંક 4)
  • સંપાદક : હરિકૃષ્ણ પાઠક
  • પ્રકાશક : ગુજરાત સાહિત્ય અકાદમી
  • વર્ષ : 2010