ઇચ્છાની મોકાણ

ઇચ્છાની મોકાણ

અલી ઇચ્છલી હો! શાને તું વળગી છો છાતીએ?

ખાટલો જો હોય તો વાણલાં ગૂંથાવીએ

ને પાથરીએ મખમલની ધડકી,

આભલે મઢેલા એય વિંઝીએ વિંઝણા

ને નીંદરની હાંકીએ હોડકી,

પણ; લાંબા પનાના આ આખાયે આયખાને ટૂંકી ચાદરમાં શું માપીએ?

અલી ઇચ્છલી હો! શાને તું વળગી છો છાતીએ?

લખી દેવું છે મારે આખું આ ગામ અને

આપી દઉં દોમદોમ સાહ્યબી,

ઓવારી જાઉં વળી સામટો ખજાનો ને

પહેરાવું સાતરંગી કાચબી,

પણ; પહેરણના ગજવાં જ્યાં ફાટેલાં હોય ત્યાં આપીઆપીને શું આપીએ?

અલી ઇચ્છલી હો! શાને તું વળગી છો છાતીએ?

ichchhanii mokaan