રેખ્તા
હિન્દવી
સૂફીનામા
રાજસ્થાની
મોગરો
mogro
બાલમુકુન્દ દવે
બાલમુકુન્દ દવે
વણવાવ્યો ને વણસીંચિયો,
મારા વાડામાં ઘર પછવાડ રે,
મોગરો મોર્યો મોર્યો રે.
આતપનાં અમરત ધાવિયો
ધોળો ઊછર્યો ધરતીબાળ રે,
મોગરો મોર્યો મોર્યો રે.
આવે સમીરણ ડોલતા
લખ કુદરત કરતી લાડ રે,
મોગરો મોર્યો મોર્યો રે.
આડો ને અવળો ફાલિયો
મસ ફૂલડે મઘ મઘ થાય રે,
મોગરો મોર્યો મોર્યો રે.
એવો મોર્યો અલબેલડો
એને ચૂંટતાં જીવ ચૂંટાય રે!
મોગરો મોર્યો મોર્યો રે.
સૃષ્ટિ ભરીને વેલ વાધતી
વળી વાધે નભવિતાન રે,
મોગરો મોર્યો મોર્યો રે.
કળીએ કળીએ રાધા રમે
એને પાંદડે પાંદડે કાન રે,
મોગરો મોર્યો મોર્યો રે.
(૧૧-૬-૪૮)
સ્રોત
- પુસ્તક : પરિક્રમા (પૃષ્ઠ ક્રમાંક 69)
- સર્જક : બાલમુકુન્દ દવે
- પ્રકાશક : વોરા એન્ડ કંપની
- વર્ષ : 1991
- આવૃત્તિ : પુનર્મુદ્રણ