રેખ્તા
હિન્દવી
સૂફીનામા
રાજસ્થાની
પથ્થર થરથર ધ્રૂજે!
paththar tharthar dhruje!
નિરંજન ભગત
નિરંજન ભગત
પથ્થર થરથર ધ્રૂજે!
હાથ હરખથી જુઠ્ઠા ન જડ, પથ્થરની ત્યાં કોણ વેદના બૂઝે?
પથ્થર થરથર ધ્રૂજે!
અનાચાર આચરનારી કો અબળા પર, ભાગોળે,
એક ગામના ડાહ્યાજન સૌ ન્યાય નિરાંતે તોળે;
‘આ કુલટાને પથ્થર મારી, મારી નાખો!’ એમ કિલોલે કૂજે!
એક આદમી સાવ ઓલિયો વહી રહ્યો’તો વાટે,
સુણી ચુકાદો ચમક્યો, થંભ્યો, ઉરના કોઈ ઉચાટે;
હાથ અને પથ્થર બન્નેને જોઈ એનું દિલ દયાથી દૂઝે!
આ દુનિયાના શાણાઓ ના દુનિયાદારી જાણે,
ટોળા પર ત્યાં એમ હસીને બોલ્યો ટેવ પ્રમાણે :
‘જેણે પાપ કર્યું ના એકે
તે પથ્થર પ્હેલો ફેંકે!’
એકે એકે અલોપ પેલા સજ્જન, જ્યારે શું કરવું ના સૂઝે!
અબળા રહી ને રહ્યો ઓલિયો, એનું કવિજન ગીત હજીયે ગુંજે!
સ્રોત
- પુસ્તક : છંદોલય (પૃષ્ઠ ક્રમાંક 241)
- સર્જક : નિરંજન ભગત
- પ્રકાશક : ગૂર્જર ગંર્થરત્ન કાર્યાલય
- વર્ષ : 1997
- આવૃત્તિ : (બીજી આવૃત્તિ)