રેખ્તા
હિન્દવી
સૂફીનામા
રાજસ્થાની
કોઈ દીવો ઠારી નાખો
koi diwo thari nakho
નવનીત ઉપાધ્યાય
નવનીત ઉપાધ્યાય
કાગળને મેં વાંચી લીધો પવન પડી ગ્યો ઝાંખો
કોઈ દીવો ઠારી નાખો.
સપના જ્યાં અંજાઈ જતાં એ આંખો થઈ ગઈ કાળી
ચાંદ-સૂરજ તેં ટાંક્યા’તા ઈ વાતોને તેં ટાળી.
તરફડતા દિવસ ઊગે ટૌકાની...તૂટી પાંખો
કોઈ દીવો ઠારી નાખો.
પંખીને મેં ડાળી દીઘી ધૂળને દીધો છાંયો
વડલા તારી જેવો વંટોળ મારી ઉપર વાયો
હવે કિનારે ખાલી દરિયો ઊભો ઝાંખો-પાંખો
કોઈ દીવો ઠારી નાખો.
સ્રોત
- પુસ્તક : દરિયાનો પડઘો (પૃષ્ઠ ક્રમાંક 69)
- સર્જક : નવનીત ઉપાધ્યાય
- પ્રકાશક : ગુજરાતી સાહિત્ય પરિષદ
- વર્ષ : 1989