દીકરીબાનું હાલરડું...

મારા રે હાલાના છેલ્લા સૂર,

તને મેલી જાશે નીંદરમાં ભરપૂર.

મારી રે વાતોના મઘમઘ વેશ,

તને મેલી જાશે સોનપરીને દેશ.

મારી રે કાયાના ઊતર્યા ઢોળ,

તને છોળી જાશે રૂપ તણા અંઘોળ.

મારી રે ચૂંદલડીની ભાત,

જોઈ કહેશે રે સૌ કોણ તારી માત.

મારા રે આ વટ ને વળોટ,

દીકરી તું જગમાં એક એની જોટ.

મારો રે આ કામગરો સંસાર,

બચકીમાં તારી બાંધી દીધો સાર.

મારાં રે હેવાતણ રાતે રંગ,

વાંચું રે તારે ચૂડલે અખંડ.

મારી રે વાતોના મઘમઘ વેશ,

તને મેલી જાશે સોનપરીને દેશ.

મારા રે હાલાના છેલ્લા સૂર,

તને મેલી જાશે નીંદરમાં ભરપૂર.

Dikribanu Halradu...