રેખ્તા
હિન્દવી
સૂફીનામા
રાજસ્થાની
હું રૉમેન્ટિક નાયક
hun romantic naayak
ભરત યાજ્ઞિક
ભરત યાજ્ઞિક
હું ભરતીનો દરિયો તૃષ્ણી! તું રેતીની છાલક
તું રેતીનું ધીમું કણસે, હું મલ્હારી ગાયક...
હું ઝાંઝર પહેરાવું ફીણની ઘંટડીઓના છૂમછૂમ,
હું મારા મોજાંની આપું કટિમેખલા રૂમઝૂમ;
છાકમછોળ કરી દઉં તારી કોરી કડાક્ સાડી,
હું ઘોઘાનો પરણેતર ને તું લંકાની લાડી;
તૃષ્ણી! હું તારી સ્ટોરીનો છું રૉમેન્ટિક નાયક...
આ તું જેને મોજાં કહે છે એ છે મારું ક્રંદન,
તું શું જાણે શાંત સપાટી નીચે પણ છે મંથન,
ખડકોમાં અથડાઈ મરી ખૂટવાની ઘટના જીવતર,
ઓટ નામનો અભાવ તારો રુવેંરુવાંનું કળતર;
હું જળની વેદીમાં બળવા બેઠેલો છું પાવક...
સ્રોત
- પુસ્તક : એક કીડીનું બ્રહ્મરંધ્ર સૂંઘવા (પૃષ્ઠ ક્રમાંક 14)
- સર્જક : ભરત યાજ્ઞિક
- પ્રકાશક : પોતે
- વર્ષ : 1985