ડાંગે માર્યાં પાણી છૂટાં પડી ગયાં રે લોલ!

પાંપણના પરદેથી મોતી દડી ગયાં રે લોલ!

તારું સ્વાગત કરવા માટે

તારા ચરણે ધરવા માટે

ફૂલ વીણવા ગયો ને કંટક અડી ગયાં રે લોલ!

ડાંગે માર્યાં પાણી...

પાંપણના પરદેથી છૂટ્યાં

તસ્બીહના મણકામાં ખૂટ્યાં

મૃગજળના દરિયામાં મોતી જડી ગયાં રે લોલ!

ડાંગે માર્યાં પાણી...

તું મારી સામે શું આવ્યો!

વિરહનો અણસારો લાવ્યો!

મલકાતાં મલકાતાં હોઠો રડી ગયાં રે લોલ!

ડાંગે માર્યાં પાણી...

ડાંગે માર્યાં પાણી છૂટાં પડી ગયાં રે લોલ!

પાંપણના પરદેથી મોતી દડી ગયાં રે લોલ!