લીલા પોપટ પઢે પાંજરે, લીલાં તોરણ પણ તે સમાન;

ત્રાજવું લીલું ગોરા ગાલમાંરે, લીલાં નાગરવેલનાં પાન,

સુંદર શોભા વરણવું.

પીળું કેસર પીળાં કેસુડાં, શોભે પીળો સોનેરી રંગ;

પીળું પાનેતર લાડીનુંરે, વરને પીળું પિતામ્બર અંગ, સુંદર...

રાતો હિંગળો સેંથે શોભીતો, રાતી કંકુની આડ કપાળ;

રાતી કન્યાતણી ચુંદડીરે, રાતા હોઠ ને પગ પણ લાલ, સુંદર...

કાળું કાજળ શોભે આંખમાં, વળી કાળો કોયલનો વેષ;

કાળા હાથી કાળી ઘનઘટારે, એવા કાળા કન્યાના છે કેશ, સુંદર...

હાથીના દાંત હંસલા, ધોળાં જાઇજુઈનાં ફુલ;

ધોળાં મોતી નથડીતણાંરે, ધોળા હીરાનો હાર અમુલ્ય, સુંદર...

મધુર સ્વર કોયલતણો, શુક સારિકા સ્વર સુખ દેણ;

મધુર સ્વર વીણા તણોરે, એવાં મધુર છે વનિતાનાં વેણ, સુંદર...

કોમળ જીભ ચકલીતણી, લાગે મોર પીં છે સુવાળાશ;

કાયા કોમળ કન્યા તણીરે, જેવાં કોમળ કમળ કપાસ, સુંદર...

રંગ રૂડા પાંચે કહ્યા, કહ્યા મધુર કોયલ ગુણ આમ;

સહુથી શોભા સદગુણતણીરે, દીસે ઉત્તમ દલપતરામ. સુંદર...