ચોખૂણિયું મારું ખેતર

ચોખૂણિયું મારું ખેતર નાનું,

કાગળનું એક પાનું.

વાવાઝોડું કોઈ ક્યાંકથી આવ્યું;

ક્ષણનું બીજ ત્યાં વાવ્યું.

કલ્પના કેરાં પીને રસાયણ

બીજ ગળી ગયું છેક.

શબ્દના અંકુર ફૂટ્યા, સુપલ્લવ–

પુષ્પનો લચ્યો વિશેષ.

લૂમ્યાં-ઝૂમ્યાં ફળ, રસ અલૌકિક :

અમૃતધારાઓ ફૂટે.

વાવણી ક્ષણની, લણો અનંતતા :

લૂટતાં લેશ ન ખૂટે.

રસનું અક્ષયપાત્ર સદાનું

ચોખૂણિયું મારું ખેતર નાનું.

chokhuuniyun maarun khetar