અબોલા સખીનું (રહસ્ય) ગીત

અમુકભાઈની તમુક છોકરી પ્હેરી ચણિયોચોળી રે

ફરે નજરની ચડઊતરમાં જાણે કે ખિસકોલી રે

છાયા જેવું રૂપ ને ઊભી તડકા હેઠે ન્હાતી રે

ફળના ભારે લચી પડેલી દાડમડી લહેરાતી રે

ટૌકે ટૌકે સૂડે એને નીંદરમાં કરકોલી રે

અમુક ભાઈની તમુક છોકરી પ્હેરી ચણિયોચોળી રે

ચપટીક ધૂળમાં નામ લખેલું, સળીએથી આળેખી રે

કહું કાનમાં વાત તો લોકો કે'શે મૂઈ અદેખી રે

વડછડનો વે'વાર હોય તો ભેદ આપીએ ખોલી રે

અમુકભાઈની તમુક છોકરી પ્હેરી ચણિયોચોળી રે

ફરે નજરની ચડઊતરમાં જાણે કે ખિસકોલી રે

Abola Sakhinu (Rahasya) Geet