છેલકડી
Chhelakdi
જગદીશ જોશી
Jagdish Joshi

નાનકડી શેરીને છેલકડી પહેરાવો એવી આ ડેલી એક લાગશે
અણિયાળી મોજડીમાં ચમક્યો સૂરજ :
એમાં પાલવ સફાળો મારો જાગશે.
લ્હેરિયાતા સાફાનું છોગું છકેલ
મારી ભીની ભીની પાંપણમાં મરકે,
પોતીકાં થડકારા ભૂલીને દલડું તો
રોઝડીના ડાબલા શું ફરકે :
ગરકેલો મોર મારો પીંછાંના માંડવડે
એકાદો ટહુકો તો માગશે!
આંખોમાં આમતેમ પારેવાં ઊડે
ને કમખામાં દીવડાની જ્યોત,
હુક્કાની જેમ મને પી જજો વા’લમા
કે હું જ કરું મારી ગોતાગોત :
તારા આવતાંની સાથે અહીં કોણે જાણ્યું કે
મારું આયખું પરાયું થઈ ભાગશે!



સ્રોત
- પુસ્તક : ધારો કે એક સાંજ આપણે મળ્યા... (પૃષ્ઠ ક્રમાંક 121)
- સર્જક : જગદીશ જોષી
- પ્રકાશક : ઇમેજ પબ્લિકેશન્સ પ્રા. લિ., મુંબઈ
- વર્ષ : 1998
- આવૃત્તિ : 1