ચલો ચમેલી, સાંજ ખીલી છે

ચલો ચમેલી, સાંજ ખીલી છે,

સાંજ તણી ખુશબોની સુરખી

કપોલ તારે આજ ખીલી છે,

ચલો ચમેલી, સાંજ ખીલી છે.

મેં નયનોમાં પુષ્પ-નયનની

પરિમલ-ધારા પૂર્ણ ભરી છે,

અહો બગીચે છટા હરિત કો

તવ વસનો શી હરીભરી છે;

ગીત ઝરણનાં ચરણ તળાંસી

કૈંક મોતીડાં કશાં ટળ્યાં છે

ચલો ચમેલી સાંજ ખીલી છે.

ચલો ચમેલી! કો રસરેલી,

આભ થકી આબ રહી ઝુકી છે,

મેં મટકી મુજ જુગ જુગ ખાલી

પનઘટ લઈ જઈ ખુલી મુકી છે;

હે બદરી તું બરસનહારી

હવાં કસોટી કોની રહી છે?

ચલો ચમેલી સાંજ ખીલી છે.

ચલો, ચમેલી, ગોરસઘેલી!

તને પ્યાસની પ્યાસ લગી છે,

આજ શ્યામની ચંદ્રચૂડ પર

મેં મારી અર્પી કલગી છે,

આજ બંસીના અધર પરે કો

અધર તણાં અહેશાન ઢળ્યાં છે

ચલો ચમેલી સાંજ ખીલી છે.

chalo chameli, sanj khili chhe