રેખ્તા
હિન્દવી
સૂફીનામા
રાજસ્થાની
ચાલને પિયા!
chalne piya!
જગદીશ જોશી
જગદીશ જોશી
વાંસની કરી છાબડી તેમાં દુઃખ મૂકીને વ્હેણમાં વ્હેતું કરી,
ચાલને પિયા! સુખની સામોસામ : થશે આ પલ તો હરીભરી....
નીલ ગગનનો દરિયો લ્હેરે
વાયરો સોનલ સાંજને ઘેરે
નેણુ આ ઝૂકે તારે ચહેરે
દૂરના કોઈ સૂર આવીને કેશમાં સિંદૂર જાય રે ભરી:
ચાલને પિયા! સુખની સામોસામ : થશે આ પલ તો હરીભરી....
નભની પેલે પાર વસે છે
સૂનો સૂનો મહેલ હસે છે
શમણાંઓ તો તસતસે છે,—
વાદળ થઈને આંખ તો પછી જાય રે ઝરી, જાય રે ઝરી :
ચાલને પિયા! સુખની સામોસામઃ થશે આ પલ તો હરીભરી....
હળવે હળવે હવા વહે
મનમાં મારા ઝંખના રહે
‘કૈંક તો કહે, કૈંક તો કહે!’
વેણ એ તારા વ્હેણમાં દીવા થઈને સરી જાય રે તરી:
ચાલને પિયા! સુખની સામોસામ! થશે આ પલ તો હરીભરી....
સ્રોત
- પુસ્તક : આકાશ (પૃષ્ઠ ક્રમાંક 81)
- સર્જક : જગદીશ જોશી
- પ્રકાશક : વોરા એન્ડ કંપની
- વર્ષ : 1972