રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
પ્રદ્યુમ્ન તન્ના
અરી ઝટપટ કોરા કેશ મહીં સઈ ચંદણ-કાંગસી ફેરવો
કંઈ કેટલે કાળ ફરીથી મનમાન્યાને હેરવો!
દૂર દેશથી ઊડઊડતી લ્યો આવી એક ચબરખી,
આછી એની રંગ-સુગંધી જોતાંને હું હરખી
માંહી લખ્યું કે આવી પહોંચું પાંગરતા પાનેરવો!
અરી ઝટપટ કોરા કેશ મહીં સઈ ચંદણ-કાંગસી ફેરવો...
નવસેરાં હૈ મીંડલાં માથે બોર ઢળકતું રાખો.
બાજુબંધ અણવટ વીંછિયાં કૈ ચણિયે ઘૂઘરી ટાંકો
ને અડવી રે’ના કેડ્ય કનકના કંદોરાને ભેરવો!
અરી ઝટપટ કોરા કેશ મહીં સઈ ચંદણ-કાંગસી ફેરવો...
વળગું જૈ કોટે કે પોંખું મીઠું મલકતાં ચ્હેરે?
ના ના સઈ મારે તો ઈને ફાગણની રંગલ્હેરે,
ફરફરતી આ ચૂંદલડીની ઝીણી ઝપટમાં ઘેરવો!
અરી ઝટપટ કોરા કેશ મહીં સઈ ચંદણ-કાંગસી ફેરવો...
કેમ વિતાવ્યાં માસ આવડાં મનડું એ જ વિમાસે
હવે ઘડી બે ઘડીય મુજને જુગ શી લાંબી ભાસે,
હીંચ નહીં નહીં લેત અધીરા ઉર-ધબકારા ફેરવો!
અરી ઝટપટ કોરા કેશ મહીં સઈ ચંદણ-કાંગસી ફેરવો...
(૧૯૬૦)
સ્રોત
- પુસ્તક : છોળ (પૃષ્ઠ ક્રમાંક 38)
- સર્જક : પ્રદ્યુમ્ન તન્ના
- પ્રકાશક : પ્રસાર, ભાવનગર
- વર્ષ : 2000