રેખ્તા
હિન્દવી
સૂફીનામા
રાજસ્થાની
ચાર ફૂલ
chaar phool
અવિનાશ વ્યાસ
અવિનાશ વ્યાસ
મ્હારી વેણીમાં ચાર ચાર ફૂલ
અંબોડલે શોભે સોહામણી એ ઝૂલ. મ્હારી.
એક ફૂલ જાણે મ્હારા સસરાજી શોભતા
મોંઘરું મોગરાનું ફૂલ;
એની સુવાસે મ્હેકે ઘરઘરનો ઓરડો
ગંભીર ને સૌમાં અતુલ. મ્હારી.
બીજું ફૂલ જાણે મ્હારી નણદી પેલી નાનકી
જાણે રૂડું ચંપાનું ફૂલ;
જ્યારે જુવો ત્યારે ખીલ્યું ને ફાલ્યું
મસ્તીમાં રહેતું મશગૂલ. મ્હારી.
ત્રીજું ફૂલ જાણે મ્હારાં સાસુજી આકરાં
જાણે પેલું સૂર્યમુખી ફૂલ;
સૂરજ ઊગતાંની સાથ માંડતું એ મ્હેકવા
સાંજ સુધી કાઢતું ભૂલ. મ્હારી.
ચોથું ફૂલ જાણે મ્હારા હૈયાના હારનું
જાણે રૂડું રાતરાણી ફૂલ :
દિવસે ના બોલે એ મ્હોટાંના માનમાં
રાતડિયે બોલે બુલબુલ. મ્હારી.
સ્રોત
- પુસ્તક : અવિનાશી અવિનાશ (પૃષ્ઠ ક્રમાંક 243)
- સર્જક : અવિનાશ વ્યાસ
- સંપાદક : અંકિત ત્રિવેદી
- પ્રકાશક : નવભારત સાહિત્ય મંદિર
- વર્ષ : 2006