રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
પારુલ ખખ્ખર
રફૂ કરેલી થીગડી માંડે છે કંઈ વાત; રાણા, સાંભળો!
હતી અમારી તમથી નોખી જાત; રાણા, સાંભળો!
જૂનાપાના પાઘની આ વારતા,
દાંત વગરના વાઘની આ વારતા,
ના ભૂંસાતા ડાઘની આ વારતા,
સૂરજ માંડે વારતા ને ઢળવા લાગે રાત; રાણા, સાંભળો!
હતી અમારી તમથી નોખી જાત; રાણા, સાંભળો!
નોખાંનોખાં પોત લઈને આવિયાં,
નોખાં જીવન-મોત લઈને આવિયાં,
નોખા કાગળ-દોત લઈને આવિયાં,
તો ય ભેળવી એકમેકની ભાત; રાણા, સાંભળો!
હતી અમારી તમથી નોખી જાત; રાણા, સાંભળો!
અમે સજનવા આવળ, બાવળ, બોરડી,
અમે સજનવા સુવાંગ, સાદી ખોરડી,
હવે થઈશું ગઢના ખૂણે ઓરડી,
શું કરવાની મોંઘેરી ઠકરાત; રાણા, સાંભળો!
હતી અમારી તમથી નોખી જાત; રાણા, સાંભળો!
ઊભડક ઊભડક ભાન લઈને આવશું,
મધરું મધરું ગાન લઈને આવશું,
વાસંતી તોફાન લઈને આવશું,
ઝીલી લેજો લહલહતી મોલાત; રાણા, સાંભળો!
હતી અમારી તમથી નોખી જાત; રાણા, સાંભળો!
સ્રોત
- પુસ્તક : રેખ્તા ગુજરાતી માટે કવિએ પોતે પસંદ કરેલી કૃતિ.