રેખ્તા
હિન્દવી
સૂફીનામા
રાજસ્થાની
ભીના વાયરા
bhina wayra
બાલમુકુન્દ દવે
બાલમુકુન્દ દવે
ઊંચી મેડી ને ભીના વાયરા મારુજી!
ડોલે મારા દીવડિયાનાં નૂર જો,
ધીરા વાજે રે તારા વીંજણા મારુજી!
પાછલી પછીતે વાગી વાંસળી મારુજી!
સૂરે સૂરે વીંધે મારાં ઉર જો,
ધીરી વાજે રે તારી વાંસળી મારુજી!
અવળે હાથે તેં મારી કાંકરી મારુજી!
સવળી થૈને વાગી તતકાળ જો,
એવા ના ખેલ ભૂંડા ખેલીએ મારુજી!
ભોળાં તે હૈયાં ના છંછેડીએ મારુજી!
બાંધી હિંડોળા એને ડાળ જો,
હૈયાંની વાડીઓ ના વેડીએ મારુજી!
(૧૯પ૦)
સ્રોત
- પુસ્તક : બૃહદ પરિક્રમા (પૃષ્ઠ ક્રમાંક 62)
- સંપાદક : હરિકૃષ્ણ પાઠક
- પ્રકાશક : ગુજરાત સાહિત્ય અકાદમી, ગાંધીનગર
- વર્ષ : 2010