ભલાજીને વખાણનાં વેણ

ભલાજીને વખાણનાં વેણ

ભલાજી તમે ભારે કરી

મારા તે બોલ પરે મેલી દીધી રે તમે

રાજતણી ભારેખમ ચાકરી!

મહુડો મ્હેક્યો માળમાં, ટપટપ મહુડાં ગરે

કોતેડીમાં કારમી અંધારું ચળીતર કરે –

ભલાજી ભલો દોરો દીધો રે તમે મંતરી

બાંધું કોટ્યે ને બાંધું કાંડે કે ઝોડ બધાં

શીશામાં જાય સીધાં તરી!

મધ બાઝ્યું છે આકડે ને સળવળ સળવળ થાય

કરો ધુમાડી લાકડે કે માંખો ઊડી જાય –

ઘૂંટડે ઘૂંટડા ભરી

પીએ ભલાજી પછી એવું કે હોઠેથી કોઠે

ટાઢ્યક જાય સોંસરી!

છેટી બાંધી છાપરી ને છેટાં રાખ્યાં ગામ

છેટાં વચ્ચે આપણો સોડાસોડ મુકામ –

ભલાજી તમે ભારે કરી

આડું કે અવળું ના જોયું ને આંખ્યુંમાં

આઠે પહોર મને ધરી!

Bhalajine Vakhan na Ven