ભજન કરે તે જીતે

ભજન કરે તે જીતે

વજન કરે તે હારે રે મનવા

ભજન કરે તે જીતે.

તુલસી-દલથી તોલ કરો તો

બને પવન-પરપોટો,

અને હિમાલય મૂકો હેમનો

તો મેરુથી મોટોઃ

આ ભારે હળવા હરિવરને

મૂલવવો શી રીતે!-

રે મનવા, ભજન કરે તે જીતે.

એક ઘડી તને માંડ મળી છે

આ જીવતરને ઘાટે.

સાચ-ખોટનાં ખાતાં પાડી

એમાં તું નહીં ખાટેઃ

સ્હેલીશ તું સાગરમોજે કે

પડ્યો રહીશ પછીતે?–

રે મનવા, ભજન કરે તે જીતે.

આવ, હવે તારા ગજ મૂકી,

વજન મૂકીને વરવાં,

નવલખ તારા નીચે બેઠો

ક્યાં ત્રાજવડે તરવા?

ચૌદ ભુવનનો સ્વામી આવે

ચપટી ધૂળની પ્રીતે-

રે મનવા, ભજન કરે તે જીતે.

bhajan kare te jite