રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
મારા નામે ચોકડી હું તો ચોકડિયાળો જીવજી
બકરી કંઠે આંચળ પકડી લટકે સત્યમ્ શિવજી
ખાલી અમથું પકડી રાખ્યું પારા જેવું કરમાંજી
ભાષાનું ખાંપણ ઓઢીને લાશ પડી ગઈ ઘરમાંજી
ધિંગાણાની ગમાણમાંથી બકરી બોલી ગાંધીજી
કલ્પવૃક્ષની ડાળે કોણે જાસાચિટ્ઠી બાંધીજી
ચણોઠીઓના ઢગલે દાઝ્યા કૈંક કવિના કિત્તાજી
શબ્દોમાં હું એમ પ્રવેશ્યો જેમ આગમાં સીતાજી
હજીયે કાળી કોતર વચ્ચે આંખ ફફડતી રાતીજી
સાંઢણીઓના વેગે ધબકે પવન ભરેલી છાતીજી
કાયમ માટે બંધ ભલેને હોય ગામનો ઝાંપોજી
શબ્દોના કાગળિયે મેં તો અક્ષર પાડ્યો ઝાંખોજી
મારા નામે ચોકડી હું તો ચોકડિયાળો જીવજી
બકરી કંઠે આંચળ પકડી લટકે સત્યમ્ શિવજી
સ્રોત
- પુસ્તક : આધુનિક ગુજરાતી કવિતા (પૃષ્ઠ ક્રમાંક 108)
- સંપાદક : સુરેશ દલાલ, જયા મહેતા
- પ્રકાશક : સાહિત્ય અકાદમી
- વર્ષ : 1989