રેખ્તા
હિન્દવી
સૂફીનામા
રાજસ્થાની
અંધ
andh
પ્રહ્લાદ પારેખ
પ્રહ્લાદ પારેખ
નેન તણાં મુજ તેજ બુઝાણાં, જોઉં ના તારી કાય:
ધીમા ધીમા સૂર થતા જે પડતાં તારા પાય,
સુણીને સૂર એ તારા,
માંડું છું પાય હું મારા.
ઝૂલતો તારે કંઠે તાજાં ફૂલડાં કેરો હાર,
સૌરભ કેરો આવતો તેનો, ઉર સુધી મુજ તાર:
ઝાલીને તાર એ તારો,
માંડું છું પાય હું મારો.
વાયુ કેરી લહરીમાં તુજ વસ્ર તણેા ફફડાટ;
સાંભળીને એ ખોજતો મારા જીવન કેરી વાટ:
ધ્રૂજતાં ડગલાં માંડું,
ધીમે ધીમે વાટ હું કાપું.
પાય તણો એ સૂર સુણું, ને આવે ફૂલસુવાસ,
વસ્ર તણો ફફડાટ સુણું હું,-એટલો રે'જે પાસ:
ભાળું ના કાયા તારી,
નેનોની જોત બુઝાણી.
સ્રોત
- પુસ્તક : બારી બહાર (પૃષ્ઠ ક્રમાંક 91)
- સર્જક : પ્રહલાદ પારેખ
- પ્રકાશક : વોરા ઍન્ડ કંપની
- વર્ષ : 1969