આકાશી અસવાર

આકાશી અસવાર

ઊની રે વરાળો પહોંચી આભમાં

ધરતી પાડે રે પોકાર;

દુખિયાંનો બેલી સમરથ ગાજિયો,

વા’લીડે કરિયો વિચાર:

આવે રે રાજાનો રાજા મેહુલો.

આવે રે દેકારા દેતો દખણે,

વરતે જયજયકાર;

છડી રે પોકારે વનના મોરલા,

ખમ્મા! આવો અનરાધાર:

આવે રે રાજાનો રાજા મેહુલો

છૂટાં રે ઊડે રાજાનાં ઓડિયાં,

ઝૂલે વીજની તલવાર;

અંકાશી ઘોડાના વાગે ડાબલા,

સાયબો થિયો છે અસવાર:

આવે રે રાજાનો રાજા મેહુલો,

નીચે રે મહેરામણ ઘેરા ગાજતા,

ઊંચે હણેણે તોખાર;

એકના પડછંદા દૂજે જાગતા,

ધરતી-આભ એકાકાર:

આવે રે રાજાનો રાજા મેહુલો

akashi aswar