અહીં નહીં તો

અહીં નહીં તો

અહીં નહીં તો આમ રે કશે -

તડકા છે તો ક્યાંક તો હશે બાવળના તો બાવળનાયે છાંયડા હશે

ચાલવું છે તો ટેકરીઓના ઢાળની કેડી

ઊતરી અને આવશે તારા પગની કને

સ્હેજ ચાલે તો લ્હેરખી તને લૈને જશે

નભની વાતો કરતા પેલા વાંસના વને

બેઉ બાજુ ઝળૂંબતી ભેખડ અવગણીને દૂરની નદી મળવાને ઉતાવળી થશે

ઝાડવાં, ડાળી, પાંદડાં, ફૂલો, થડની સાથે

પંખીઓ ઝૂલે સામટાં ને લેલૂમ

મીટ માંડીને નીરખતાંવેંત હું જ પોતે

થઈ જાઉં પોતામાં સાવ અચાનક ગુમ

ધૂળથી રજોટાઈ આ મારગ ઘર લગી લંબાય છે મને મૂકવા મશે

તડકા છે તો ક્યાંક તો હશે બાવળના તો બાવળનાયે છાંયડા હશે

અહીં નહીં તો આમ રે કશે -

Ahi Nahi To