અભાનોર્મિ

અભાનોર્મિ

(કાફી)

ગગને આજ, પ્રેમની ઝલક છાઈ રે, ગગને આજ પ્રેમની૦

પૃથિવી રહી છવાઈ,

પરવતો રહ્યા નાહી,

સચરાચરે ભરાઈ રે. – ગગને૦

ભૂત ને ભવિષ્ય ગયા.

વર્તમાન સર્વ થયા,

એકમાં અનેક રહ્યા રે. – ગગને૦

કીડીથી કુંજર સુધી,

ગળી ભેદબુદ્ધિ ઊંધી,

વાટડી અભેદ સુધી રે. – ગગને૦

વાદ ને વિવાદ ગળ્યા,

ઝેર વિખવાદ ટળ્યા,

જુદા સહુ ભેગા મળ્યા રે. – ગગને૦

વ્રત જોગ તપ સેવા,

જૂઠા છે પ્રસાદ મેવા,

પંડિતો વેદાંતી તેવા રે. – ગગને૦

ધનભાગ્ય તેનાં જેણે,

પ્રેમ પી નિહાળ્યો નેણે,

સુખને શું કે’શે વેણે રે. – ગગને૦

સાંભળશે કોણ કે’શે?

શા થકી વખાણી લેશે?

ન કહો કે’વાઈ રે’શે રે! – ગગને૦

પ્રેમ જે કહી બતાવે,

પ્રેમ જે કરી બતાવે,

મણિ તેને મન ભાવે રે. – ગગને૦

abhanormi