રેખ્તા
હિન્દવી
સૂફીનામા
રાજસ્થાની
પૂછશો મા
puchhsho ma
ન્હાનાલાલ દલપતરામ કવિ
ન્હાનાલાલ દલપતરામ કવિ
પૂછશો મા, કોઈ પૂછશો મા,
મ્હારા હૈયાની વાતડી પૂછશો મા.
દિલના દરિયાવ મહીં કાંઈ કાંઈ મોતી:
ગોતી ગોતીને ત્હેને ચૂંથશો મા;
મ્હારા હૈયાની વાતડી પૂછશો મા.
ટહુકે છે કોકિલા, પુકારે છે પપૈયો,
કારણોના કામીને સૂઝશો મા;
મ્હારા હૈયાની વાતડી પૂછશો મા.
આંસુના નીરના કો આશાના અક્ષરો:
આછા, આછા, ત્હોય લૂછશો મા;
મ્હારા હૈયાની વાતડી પૂછશો મા.
જગના જોદ્ધા! એક આટલું સુણી જજો :
પ્રારબ્ધનાં પૂર સ્હામે ઝૂઝશો મા!
મ્હારા હૈયાની વાતડી પૂછશો મા.
પૂછશો મા, કોઈ પૂછશો મા,
મ્હારા હૈયાની વાતડી પૂછશો મા.
સ્રોત
- પુસ્તક : ન્હાનાલાલ-મધુકોષ (પૃષ્ઠ ક્રમાંક 56)
- સંપાદક : અનંતરાય રાવળ
- પ્રકાશક : સાહિત્ય અકાદમી
- વર્ષ : 2002