રેખ્તા
હિન્દવી
સૂફીનામા
રાજસ્થાની
(ગરબી)
સખી, રૂઠ્યો છે આજ રસિક સામળો જો;
હશે પાતળાના પેટમાં શો આમળો જો? સખીo
સખી, ખાવા ધાયે છે ચંદન ખાટલો જો;
નથી કોદી રિસાયો તે સુંદર આટલો જો. સખીo
સખી, ચંદ્ર મને આજ બાળે છે બહુ જો;
સજન સાથ સહિયર મહાલતી હશે સહુ જો. સખીo
સખી, વાળા વીજણ વા તે લૂ લહું જો;
ભભૂકા ઊઠે છે ભીતરે શું શું કહું જો? સખીo
સખી, બોલી ન ચાલી રિસાવા સમું જો;
વિના કારણે આ વેદના કેમે ખમું જો? સખીo
સખી પાણી મૂક્યું ન હું પીઉં જમું જો;
અરે, લાવ મનાવી તુંને પાયે નમું જો. સખીo
સખી, નર્મદાને દૂખ કેમ આલતો જો?
કહેજે આવી જરા ઓ ભૂંડા તું હાલ તો જો. સખીo
કહેજે નર્મદા મૂકી તું કહાં મહાલતો જો;
લઇ ગાલરે દરસાવ જૂઠું વહાલ તો જો. સખીo
સ્રોત
- પુસ્તક : શ્રેષ્ઠ નર્મદ (પૃષ્ઠ ક્રમાંક 24)
- સંપાદક : રમણ સોની
- પ્રકાશક : ગૂર્જર ગ્રંથરત્ન કાર્યાલય
- વર્ષ : 2023