રેખ્તા
હિન્દવી
સૂફીનામા
રાજસ્થાની
(“મારું સોનાનું છે બેડું રે, છેલ છબીલા છોગાળા.”-એ રાગ)
સખી જો આ સુંદર શોભેરે, ફુલવાડીમાં જુઈ ફૂલી;
જોઈ લોકોનો મત લોભેરે, ફુલવાડીમાં જુઈ ફૂલી.
છે દેખાતી તો છોટીરે, ફુલવાડીમાં જુઈ ફૂલી;
ગુણ ગણતાં તો છે મોટી રે, ફુલવાડીમાં જુઈ ફૂલી.
વડી વસ્તીમાં વખણાઈરે, ફુલવાડીમાં જુઈ ફૂલી;
છે બાળકી જેવી બાઈ રૈ, ફુલવાડીમાં જુઈ ફૂલી.
સૌ જન કહે સાદી સારીરે, ફુલવાડીમાં જુઈ ફૂલી;
કહિયે કોઈ દેવકુમારીરે, ફુલવાડીમાં જુઈ ફૂલી.
વનિતાને લાગે વ્હાલીરે, ફુલવાડીમાં જુઈ ફૂલી;
નથી ઠાઠ જણવતી ઠાલીરે, કુલવાડીમાં જુઈ ફૂલી.
નથી કોઈ કહેતું કોઈ નઠારીરે, ફુલવાડીમાં જુઈ ફૂલી;
નિરખી હરખે નરનારીરે, ફુલવાડીમાં જુઈ ફૂલી.
એવી પુત્રી જે જન પામેરે, ફુલવાડીમાં જુઈ ફૂલી;
જગમાં તેનો જશ જામેરે, ફુલવાડીમાં જુઈ ફૂલી.
જુઈ ઠરજો સુખી સૌ ઠામેરે, ફુલવાડીમાં જુઈ ફૂલી;
દીધી આશિષ દલપતરામેરે, ફુલવાડીમાં જુઈ ફૂલી.
સ્રોત
- પુસ્તક : દલપતરામનાં શ્રેષ્ઠ કાવ્યો (પૃષ્ઠ ક્રમાંક 88)
- સંપાદક : ચન્દ્રકાન્ત ટોપીવાળા
- પ્રકાશક : પાર્શ્વ પબ્લિકેશન
- વર્ષ : 2008