રેખ્તા
હિન્દવી
સૂફીનામા
રાજસ્થાની
યેવતુશેન્કોને...
yewatushenkone
આદિલ મન્સૂરી
આદિલ મન્સૂરી
‘લિબર્ટી’ અંદરથી
પોલી ભલે રહી
પણ
પેલું લેનિનનું બાવલું
ક્યાં ગયું?
*
બ્રેડના અભાવના
ધસમસતા પૂરમાં
ટૅન્કો ને મિસાઈલોના
ખડકલા
તણાઈ ગયા
*
માણસને
ક્યાં સુધી
મુશ્કેટાટ બાંધી રાખશો
એના
આંતરડે?
*
દાતરડાના માથે
હથોડો પડ્યો ને
હથોડાનો હાથ
દાતરડે બઢાયો
*
કરોડો માણસોના
લોહીથી ખરડયેલો
ધ્વજ
સત્તાનું કફન બન્યો
છેવટે
તૂટેલા નખોવાળું
વરુ
ગુફામાં
પડ્યું પડ્યું
કણસી રહ્યું.
સ્રોત
- પુસ્તક : મળે ન મળે (પૃષ્ઠ ક્રમાંક 275)
- સર્જક : આદિલ મન્સૂરી
- પ્રકાશક : વોરા ઍન્ડ કંપની
- વર્ષ : 1996