વાત એટલેથી જ અટકી ગઈ છે

પાનના ગલ્લાની પેટ્રોમેક્સના ઝાંખા ઉજાસમાં,

સ્કૂટરોના કર્કશ અવાજ મધ્યે,

સાંજે વાયુ ભરેલા ફુગ્ગા અપાવેલા

શિશુઓને આંગળીએ વળગાડી

આવતાં જતાં રવીવારીય લોકો વચ્ચે,

ઓછું વપરાતા બસસ્ટેંડના

ઘોર નિર્જન બાંકડા પર,

મ્યુનિસિપાલિટીના ગુલમ્હોરવૃક્ષની

એક ડાળ નીચે,

પદ્માસને ધ્યાનસ્થ એવા મને

બોધિજ્ઞાન થવાની ક્ષણે જ

અચાનક

એક સૌમ્ય છીંક

આકાશમાંથી નીચે ઊતરી આવી;

અને હે શ્રમણભિક્ષુઓ

વાત એટલેથી જ અટકી ગઈ છે....

વાત એટલેથી જ અટકી ગઈ છે.....

wat etlethi ja atki gai chhe