એક જાડું રીંગણું પડ્યું યારી રોડ પર

એનો ચમકતો જાંબલી રંગ દેખાયો

ઘરે જતી કામવાળી બાઈને.

આમતેમ જોયું, ઉપાડી લીધું,

રાતે એને ત્યાં બન્યું ઓળાનું શાક,

મફતનો ઓળો એના વરને બઉ ભાવ્યો

એનાં બાળકોને ઓછો.

ત્રણ ટામેટાં પડ્યાં વર્સોવામાં

એક ટામેટું કૂતરો ખાઈ ગયો,

એ કૂતરાને ટામેટું ખાતાં જોઈ વિચલિત માણસે

બીજા ટામેટા પર પગ મૂકી દીધો

કચડાયેલું ટામેટું જોઈ ત્રીજું ટામેટું ગભરાઈને

ફૂટપાથના ખૂણામાં અવાજ કર્યા વગર બેઠું

એ જ રાતે બે ઉંદરોએ એ ત્રીજા ટામેટાનાં

બસ, બે સંતાન રસ્તા ઉપર બાકી રાખ્યાં

એ સંતાનો ક્યારેય મોટાં ના થયાં.

બે લીંબુ પડ્યાં સાત બંગલામાં

એક કડક લીંબુ આવ્યું કોઈ જાડી સ્ત્રીના પગ નીચે,

પગ મરડાયો, કુંભની જાત્રા રદ થઈ

બીજું લીંબુ હતું કોઈ બિલ્ડિંગના ચોકીદારની કૅબિન પાસે

ચોકીદારની દાળ આજે સ્વાદિષ્ટ બની ગઈ,

કાલની દાળ માટે અડધું લીંબુ સાચવી રાખ્યું.

સરગવાની સીંગનું બંડલ પડ્યું ચાર બંગલામાં

મર્સિડિસમાંથી ઊતરતી અભિનેત્રીએ

દરવાજો ખોલતાં એ બંડલ જોયું.

પહેલાં ધ્યાન ન આપ્યું,

ખરીદી કરી પાછી આવી

બંડલ ત્યાં જ હતું,

ઉપાડી લીધું, ડ્રાઇવરે રિઅરવ્યૂ મિરરમાંથી નોંધ્યું.

અભિનેત્રીએ સરગવાની સીંગનો સૂપ બનાવ્યો

એ દિવસ પછી સૂપની આદત પડી

એની બીમારીઓ દૂર થઈ

ડ્રાઇવરને નોકરીમાંથી કાઢ્યો, એ બહુ બીમાર પડતો હતો.

ભાગતાં ભાગતાં…

મનીષ નગરમાં પડ્યાં થોડાં ટીંડોળાં

આઝાદ નગરમાં કિલોભર બટેટાં

ગિલ્બર્ટ હિલ રોડ ઉપર લીમડાની મોટી ડાળી,

સાગર સિટીમાં ઘણા બધા કાંદા

જેનો ઉપયોગ થયો ત્યાંનાં અમુક ઝૂંપડાંની મટન અને ચિકન કરીમાં.

એની લારી સાથે ભાગતો શાકભાજીવાળો પહોંચ્યો

એના વિખરાયલા ઝૂંપડા પાસે

એનું બધું જ બધે વિખરાયેલું

એની ઘરવાળી રસ્તા ઉપર પડેલાં રીંગણાની જેમ

બુલડોઝરની સામે રડતી, આળોટતી

એનાં બાળકો ત્રીજા ટમેટાંની જેમ ગભરાયેલાં

એની પોતાની આંખોમાંથી અડધા લીંબુના ટીપા જેવાં આંસુ

રસ્તા ઉપર સુકાઈ રહ્યા હતા.

એને બચેલી સરગવાની સીંગ ફેંકી બુલડોઝર ઉપર

પોલીસવાળાએ દંડરૂપે એની લારી પલટી

બધાં જ શાકભાજી ત્યાંથી ભાગી છૂટ્યાં.

બધું જ બધે વિખરાયેલું.