વાડ-વેલા ઝાંખરામાંથી પંખી ઊડ્યું

વાડ-વેલા ઝાંખરામાંથી પંખી ઊડ્યું -

ને વીજળીના તારમાં ફાટેલો પતંગ થઈ ભરાઈ ગયું.

હજી હમણાં જ પાછી વળેલી ગોરજમાં

કોણ જાણે ક્યાંથી ભળી ગઈ આ ડીઝલની વાસ;

ને હવે તો બસ ચારે કોર ધૂણી... ધૂણી... ધૂણી...

બોરડીના જાળામાં બચી ગયેલું

છેલ્લું ચણીબોર લેવા હજી તો હાથ લાંબો કરું છું -

ને સામે અથડાય છે

ભેળપુરીના ખુમચા ને થોડા ભાવતાલના સિક્કા.

અડાયાં છાણાં વીણવા દોડતી

લીલી ઓઢણીવાળી પેલી છોકરીના પગ નીચે

આવી જાય છે કેળાંની છાલ;

ને ટ્રાફિકના પોલીસની વીસલમાં વિલાઈ જાય છે

એક કૂમળી ચીસ -

ઓળકોળાંબાની ડાળ પરથી

હજી તો હમણાં જ કૂદી પડ્યો છું;

ને જોઉં છુ તો ચારેકોર ભીંતો… ભીંતો… ભીંતો...

Vad-Vela Zankhara Mathi Pankhi Udyu