છેલ્લું નહીં અને પહેલ વહેલું પણ નહીં જ

આ ઉમેરણ છે

સતત ભીડ વચ્ચે ટુંપાઈ જતા આકાશ નીચે

વારંવાર કરેલા તને ચુંબનમાં

તારી ઘવાયેલી આંગળીને

પાટો બાંધી તને ભેટવામાં

ઝબકતી એલ. ઈ. ડી. નીચે

તને રંગ બદલતા જોવામાં

હવે તું આપણી વચ્ચેની સદીઓમાં

ગા

ચીસો પાડ

(અ)મને ધિક્કાર

કે સાવ વપરાયેલો પ્રેમનો અર્થ શોધ

(આ જ ક્રમમાં એમ નહીં)

પણ

તારા પ્રેમી(ઓ)ની આ એક સલાહ માન

તારા પરસેવાયા ગળાની ગંધને વહેતી મૂક

(અ)મને ગૂંગળાવ

અને લઈ જા ખૂટી જવાની હદ સુધી

અને પછી ઉમેર

તારા ઘવાયેલા હોઠનો અજાણ્યો સ્વાદ