રેખ્તા
હિન્દવી
સૂફીનામા
રાજસ્થાની
સમય
samay
મણિલાલ દેસાઈ
મણિલાલ દેસાઈ
સમય
એ સડક પર પડેલા પથ્થર પર ચોંટેલી ધૂળ નથી,
કદાચ તડકો હશે.
સમય
એ વૃદ્ધનાં હાડકાંમાં જામી ગયેલું જાડ્ય નથી,
કદાચ મૌન હશે.
સમય
એ હંમેશાં ચાલતાદોડતા રથનું પૈડું નથી,
કદાચ અશ્વ હશે.
સમય
એ સૂરજને કે ચન્દ્રને ડુબાવવાની ભરતી નથી,
કદાચ દરિયો હશે.
સમય
એ અવાવરુ કૂવાનાં લીલ ઝુલાવતાં પાણી પર સૂતેલું અંધારું નથી,
કદાચ કૂવો હશે.
સ્રોત
- પુસ્તક : રાનેરી (પૃષ્ઠ ક્રમાંક 50)
- સર્જક : મણિલાલ દેસાઈ
- પ્રકાશક : ગૂર્જર ગ્રંથરત્ન કાર્યાલય
- વર્ષ : 1987
- આવૃત્તિ : 2