રેખ્તા
હિન્દવી
સૂફીનામા
રાજસ્થાની
સ્મરણ
Smaran
જયદેવ શુક્લ
જયદેવ શુક્લ
દાદીમાના વાડામાં
ડોલતી
પીળી કરેણને
આજે સ્પર્શું છું :
ને બજી ઊઠે છે
સોનાની સો સો ઘંટડીઓ.
ઓરસડી પર ઘસાતી
સુખડમાંથી
જાગી ઊઠે છે
પરોઢિયે ઊંઘમાં સાંભળેલા
સ્તોત્રો.
ચાંદીની વાડકીમાં
ચન્દન જોતાં જ
કેશર - એલચીથી મઘમઘતા
મુરબ્બા માટે
હિજરાય છે ટેરવાં...
હૃદય હજીય
દાદીમાના
ગળચટા થપથપાટને
પડઘાવ્યા કરે છે
બન્ધ ડેલીની
સાંકળ
ખખડાવ્યે જાઉં છું…
પીળાં કરેણ
ખર્યે જાય છે
ટપોટપ
ટપોટપ…
સ્રોત
- પુસ્તક : કવિતા - ફેબ્રુઆરી, 1980 (પૃષ્ઠ ક્રમાંક 13)
- સંપાદક : સુરેશ દલાલ
- પ્રકાશક : જન્મભૂમિ પ્રકાશન, મુંબઈ