રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
હીરોશિમાની તે બાલિકાને
hiroshimani te balikane
સ્નેહરશ્મિ
સ્નેહરશ્મિ
એટમબૉમ્બના વિસ્ફોટ પછી
એક ભાંગેલી દીવાલ પર
અંકિત થઈ રહેલી,
નિશાળે જતાં બૂટની છૂટી ગયેલી
દોરી બાંધતી હે ગભરુ કન્યા,
થથરે છે ભયથી તારી પ્રતિમા જોતાં
એટમબૉમ્બના ભંડારોના ચોકીદારો,
ને પ્રેરે છે એ કરવા આપઘાત
એટમબૉમ્બ ઝીંકનાર વિમાનીને!
હે નિષ્પાપ કન્યા,
સંહારના કરાળ ખડક તરફ
ધસી રહેલાં જગતનાં રાષ્ટ્રોનાં
વહાણો માટેની તું છે
ઝબૂક ઝબૂક થતી અમર દીવાદાંડી!
તારી શહીદીમાંથી ફૂટે છે
જગતના હૈયાનાં વેરાન રણોને
નવપલ્લવિત કરતી,
મૈત્રી ને કરુણાની
શાશ્વત સરવાણી!
સ્રોત
- પુસ્તક : સકલ કવિતા (પૃષ્ઠ ક્રમાંક 742)
- સર્જક : સ્નેહરશ્મિ
- પ્રકાશક : વિદ્યાવિહાર પ્રકાશન
- વર્ષ : 1984