સમુદ્ર વર્ણન : બંદર

સમુદ્ર વર્ણન : બંદર

(વસંતતિલકા વૃત્ત)

લોકો સમસ્ત શુભ સાગર આ વિલોકો,

જોવા રૂપાળિ રચના ચિત્તવૃત્તિ રોકો;

આ છે પ્રભુનું પરિપૂરિત પાણિપાત્ર,

જેમાં જણાય જળ ને જળજંતુ માત્ર.

સિંધુતણા સરસ શોભિત ઘાટ બાંધ્યા,

છેડા જમીન નિધિના ધરી જેમ સાંધ્યા;

ત્યાં થંભ દેખી કવિએ ચિત વાત ધારી,

સાંધો દૃઢાવ કરવા દૃઢ મેખ મારી.

તૂટ્યાં ફુટ્યાં તટ વિષે જળમાં સડે છે,

બીજે સ્થળે વિવિધ નાવ નવાં ઘડે છે;

તે જેમ પંથ અસલી બગડ્યા જણાય,

બીજા નવીન ઉપજે બહુ સંપ્રદાય.

હિંદુ તથા યવન લોક ઘણા મળ્યા છે,

તે આમ તેમ વિચરે હરખે ભર્યા છે;

જાણે સમુદ્ર મથતાં અમિ નીકળ્યું છે,

દેવાસુરોનું જુથ પાન પીવા મળ્યું છે.

જેણે દિઠા ન નિધિ મધ્ય મહા તરંગ;

કંપે તરંગ તટના અવલોકિ અંગ;

જાવું સમુદ્ર તરીને તટમાંજ ત્રાસે,

તે કેમ નાવ ચઢિને નિધિ પાર જાશે.

Samudra Varna : Bandar