રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
બારિન મહેતા
આપણે હકીકતોને ખોલીને બેસીએ તો
આંખોને શરમનો પડદો
વાચાને અર્ધસત્યોના લપેડા
ને કલમને સત્યનો ડંખ
-આટલું કદાચ મળી આવે
એ મેળવીને ય શું?
શું કરીએ આપણે એનું?
સમયને હોય તો માણસનો ચહેરો હોય.
ફૂલ-વૃક્ષ-નદી-પર્વત-ખીણ-આકાશનો જ નહીં.
ને એથી ઊલટું
માણસનો ચહેરો ઘવાય તો ઘવાય સમય
ફૂલ-વૃક્ષ-નદી-પર્વત-ખીણ-આકાશ પણ ઘવાય
આપણે આને હકીકત જ ગણીએ તો
આ ક્યા પ્રકારનું સત્ય હોઈ શકે?
શ્વાસો ઉપર અણુબોમ્બનું સરનામું લઈ
ચન્દ્ર ભણી ચાલતો માણસ
શું થશે એનું?
હકીકતો આમ કશું બોલતી નથી
વ્યક્ત થાય છે સાચા કવિ જેમ વ્યંજનામાં
એ સ્થૂળ નથી, સ્થૂળતા તો એનું આવરણ
એનો વર્તમાન હોતો નથી કેવળ સ્થગિત
એ પડછાયે પડછાયે વસે છે
ખસે છે
ને સ્પર્શે છે
ભવિષ્યની પ્રત્યેક ક્ષણને
આ ક્ષણ તે જ માણસ
આવતીકાલનો માણસ
પરિવર્તન માગતો માણસ!
આપણે જો હકીકતોને ખોલીને જે બેસીએ તો...
સ્રોત
- પુસ્તક : યાદવાસ્થળી (પૃષ્ઠ ક્રમાંક 1)
- સર્જક : બારીન મહેતા