raat ra - Free-verse | RekhtaGujarati

રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો
search search
લૉગ-ઇન

રાત-ર

raat ra

કિશોરસિંહ સોલંકી કિશોરસિંહ સોલંકી
રાત-ર
કિશોરસિંહ સોલંકી

ધૂણતાં ઢોલ

નાચતાં ડાકલાં

હાથ પકડીને ઊભા ટોડલા

ટગર ટગર તાકી રહેલાં પૈણાયાં

નીચું નમીને નીતરવા માંડ્યું

દીવેલની વાઢીનું નાળચું.

ચોરસીમાંથી ઘીનો ઘાડવો

બહાર આવીને બેસી ગયો પાસે

માંચાની આંદેણી આંખો ચોળતી ચોળતી

ઊભી થઈને રોવા બેઠી

ગોદડાના ગાભાએ ઊંહકારો કરી

ગળફો કાઢ્યો હાક્...થૂ...

ચૂલામાં અડવેલું ઊંબાડિયું

પીવા માંડ્યું ધુમાડો

રાખમાં ચીપિયો

શોધવા માંડ્યો અંગારા

પાણિયારું ઊજાતું જઈને

લઈ આવ્યું નારિયેળ

વળગણીએ લટકતાં બાળોતિયાં

એકબાજુ મૂકી દીધાં

આળિયાએ ઊભા થઈને

ભાથડી ખોલી કાઢી તમાકુ

ખાઈણિયો સાંબેલું લઈને

કૂશકા ખાંડવા બેઠો

ઘંટી થાકી-પાકી

ટૂંટિયું વાળીને સૂઈ ગઈ

ઉખડેલા લેંપણમાં

દાણા વેરાયા

કંકુનો પડો ઢોળાયો જેફરાંમાં

ભેંતડાં આઘાપાછાં થઈ ગયાં

ખૂણામાં પડેલી સાવરણી

હાકોટા-છીંકોટા સાથે

ઘરમાં ઘૂમવા લાગી

ત્યારે

ધૂણતાં ઢોલ અને નાચતાં ડાકલાં

સામે

સૂકાઈ ગયેલી

બોઈડીના કાંટા જેવાં

હાડપિંજર

માથેથી ફાળિયાં ઉતારી

ખોળા પાથરીને કરગરવા માંડ્યાં

કરગરવા માંડ્યાં...

પણ આ અંધારાને જણનારી રાત

કેમેય કરીને ખસે જ નહિ!

સ્રોત

  • પુસ્તક : અજાણ્યો ટાપુ (પૃષ્ઠ ક્રમાંક 48)
  • સર્જક : કિશોરસિંહ સોલંકી
  • પ્રકાશક : પાર્શ્વ પ્રકાશન
  • વર્ષ : 1997