પેરેલિસિસના પેશન્ટનું કાવ્ય

ભાઈ શિલ્પી,

તારું ટાંકણું લઈને આવ,

મારા આ જમણા અંગની

શિલા ઉપર લગાવ!

ને કોઈ બેનમૂન પ્રતિમા કંડાર

જેના હાથમાં હોય સિતાર

ને એના પર એની આંગળીઓ નાચતી હોય!

અથવા આ પથ્થરમાંથી

પ્રગટાવ થોડાં પંખી

જે પાંખ ફફડાવી ઊડતાં હોય

બસ, ઊડતાં જ હોય એમ દેખાય.

અગર તો

આ પડખે વળગેલ પાષાણમાંથી

નિર્મી દે એક શિશુ

જેને એની જનની

બગલમાં ગલગલિયાં કરી

હસાવતી હોય!

ને આમાંનુ કાંઈ ન આવડે

તો પછી હે કલાકાર!

નિપજાવ એમાંથી ઈસુનો આકાર

જે વધસ્તંભે લટકતો હોય

પણ ખીલા ભોંકાય ત્યારે

સ્વસ્થ ક્ષમાબોલ ઉચ્ચારવાને બદલે

ચીસ પાડતો હોય, હા, ચીસ!

ચાલ કર પ્રહાર આ પથ્થરિયા અંગ પર

આજ તો ખુલ્લેમુખ

ચીસ પાડ્યાનું આપી દે સુખ!

perelisisna patientnu kavya