રેખ્તા
હિન્દવી
સૂફીનામા
રાજસ્થાની
ધૂળ
dhool
યજ્ઞેશ દવે
યજ્ઞેશ દવે
રવિવારે નિરાંતે
ઝાપટિયાથી ધૂળ ઝાપટી
તો ઝપટાઈ ગયા
હસ્તિનાપુર ને મગધ
બેબિલોન ને બુખારા
એથેન્સ એલેક્ઝાન્ડ્રિયા
ન્યૂયૉર્ક ને બ્રાઝિલિયા.
*
ધૂળ – પગલાં પાડે છે
ભૂંસે છે પણ!
*
વગડામાંથી આવું છું
તો વળગી પડે છે
ઘાસના બદામી બીજ
મને માટી જાણીને
હા, હું માટી છું તે વાત તો સાવેય સાચ્ચી
પણ...
તેને તો હજી કેટલીય વાર………
ત્યાં તો અંદરથી જ કોઈ પૂછે છે
કેટલી છે હવે વાર?
*
હે મેઘ!
અલકાનગરીમાં
કુરવક કરેણ કદંબ કુંદ
બકુલ અંબ અર્જુન ભલે હોય,
મારી યક્ષિણી પણ ભલે હોય;
પણ ત્યાં શું
ધૂળ છે?
*
પથ્થરની નહીં
પણ
બહુ બીક લાગે છે
આ ધૂળની
વસે છે એ ટેબલ પર, ટી.વી. પર
ભૂર્જપત્રો પર, પ્રેમ પર...
ખુરશી પર, નગરો પર
અણદીઠ
એકસરખી
ધીરેધીરે
ચૂપચાપ...
બહુ બીક લાગે છે
આ ધૂળની!
સ્રોત
- પુસ્તક : ચૂંટેલી કવિતા: યજ્ઞેશ દવે (પૃષ્ઠ ક્રમાંક 79)
- સર્જક : યજ્ઞેશ દવે
- પ્રકાશક : ગુજરાત સાહિત્ય અકાદમી, ગાંધીનગર
- વર્ષ : 2020