ઘણીયે વાર એવું થાય છે

કે પરપોટો છે.

ગળાથી ચાર આંગળ નીચે

છાતીનાં પાટિયાની બિલકુલ પાછળ.

ગમે તેટલી હચમચાવું છાતી

પરપોટો નીકળતો નથી

મારી પાંસળીઓનું લચીલાપણું

આ પરપોટાને કામ લાગે છે

ક્યારેક ભ્રમણા થાય છે

કે હવામહેલમાં મારું એકલપેટું રાજ છે

(જોકે કોઈને કાનોકાન ખબર નથી આ મહેલ વિશે

એટલે જ સદીઓથી હું પદભ્રષ્ટ થયો નથી.)

ને પછી તરત જ હબકી જાઉં છું

ફરી ફરી ચાર આંગળીઓથી માપ્યા કરું છું

કે કદાચ જ

જો આંગળીઓ ઓછી થવા લાગે તો..

માટે જ

ગળાની નળીઓમાં કશુંય હું ભરી રાખતો નથી

તું મને આમ અનિમેષ તાકી રહે છે ત્યારે

હું ચીસ પાડી લઉં છું