કૂકડા વિનાની સવાર

કૂકડા વિનાની સવાર

ખરી વાત છે :

કૂકડો ન બોલે,

તો સવાર ન પડે

એવું કંઈ નથી.

પડોશીના વાડામાં કૂકડો

બોલે, ને તમે

આળસ મરડો,

કે પથારીમાં ઍલાર્મ

રણકે, ને તમે

ઊછળીને બેઠા થઈ જાઓ—

સવાર તો આમ પણ

પડશે, ને તેમ પણ.

આભમાંથી કશુંક પડશે

ને ધરતી પર પટકાશે.

ત્યારે પરોઢ ફૂટશે

ને એમ સવાર પડશે.

કાળાં ઝાડ-પાન લીલાં થશે.

ફૂલો રાતાં, પીળાં, નીલાં ને ગુલાબી થશે.

બધે બધું રંગબેરંગી થશે.

કાગડા, કાબર, પોપટ, ચકલી

કલશોર કરશે.

એવે ટાણે કૂકડો ન બોલે,

તો સવાર ન પડે

એવું નહીં થાય.

ખરી વાત છે.

તોય જરીક

સુનુંસૂનું તો લાગશે ને!

kukDa winani sawar